ܫܘܥܝܬܐ ܟܪܝܬܐ: ܘܒܕ ܡܛܐ ܚܙܘܩܝܢ ܠܫܘܠܡܐ

ܘܒܕ ܡܛܐ ܚܙܘܩܝܢ ܠܫܘܠܡܐ

ܒܸܕܟ̣ܵܪܵܐ ܝ݇ܘܸܢ ܚܲܒܝܼܒ̣ܬܝܼ ܟܲܕ ܓܲܕܘܼܪܵܐ ܝ݇ܘܢ ܗܘܵܐ ܛܲܥܘܼܠܹܐ ܥܲܡ ܒܢܘܿܢܹ̈ܐ ܕܡܵܬܝܼ، ܐܝܼܡܲܢ ܕܩܪܹܐ ܠܵܗ݁ ܐܸܠܝܼ ܝܸܡܝܼ. ܫܒܸܩܠܝܼ ܠܛܲܥܲܠܬܵܐ، ܘܐܲܝܟ̣ ܕܒܸܕܟ̣ܵܪܵܐ ܝܘܸܢ ܫܘܵܪܵܐ ܒܲܪܵܢܹܐ ܝܗܘܵܐ، ܕܪܵܒܵܐ ܡܲܚܒܸܢ ܗܘܵܐ ܠܵܗ݁ ܘܗܲܠ ܐܸܕܝܘܿܡ..

ܫܒܸܩܠܝܼ ܠܛܲܥܲܠܬܵܐ ܘܪܚܸܛܠܝܼ.. ܪܚܸܛܠܝܼ ܩܲܠܘܼܠܵܐ ܨܹܝܕ ܝܸܡܝܼ ܟܲܕ ܒܟܠܵܝܗܝ ܚܘܼܫܵܒ̣ܝܼ ܕܝܸܡܝܼ ܒܸܩܪܵܝܝܼ ܝ݇ܠܵܗ݁ ܕܐܵܙܸܠ݇ܢ ܥܲܡܵܗ݁ ܠܒܹܪ̈ܝܼܹܐ (ܒܸܝܬ ܪܵܥܝܹܐ).. ܫܘܿܪܹܐܠܝܼ ܨܲܠܡܘܿܢܹܐ ܕܵܐܟ̣ܝܼ ܒܸܕ ܡܥܲܕܪܸܢ ܠܝܸܡܝܼ ܟܲܕ ܝܵܬܒܸܢ ܥܲܡܵܗ݁ ܓܵܘ ܣܲܕܵܢܹܐ.. ܒܛܵܥܢܸܢ ܠܣܲܛܠܵܐ ܕܚܲܠܒܼܵܐ ܘܡܲܕܟܸܪܸܢ ܠܝܸܡܝܼ ܕܐܝܼܡܲܢ ܡܵܝܥܵܐ ܘܙܵܡܪܵܐ ܙܡܝܼܪܵܬ݂ܵܐ ܒܲܣܝܼܡܹ̈ܐ ܕܓܘܼܕ݂ܵܐ، ܕܠܵܐ ܡܲܢܫܝܵܐ ܕܥܵܒ̣ܕܵܐܠܝܼ ܚܕܵܐ ܟ̃ܝܼܥܬܵܐ ܓܘܼܪܬܵܐ ܕܟܲܪܥܵܐ، ܣܵܒܵܒ ܗܵܕܟ̣ܵܐ ܡܘܿܠܸܦܬܝܼ ܗܘܵܐ ܢܵܢܘܿܢܬܝܼ ܘܐ݇ܡܝܼܪܬܝܼ:

ܕܟ̃ܝܼܥܬܵܐ ܕܟܲܪܥܵܐ ܫܵܒ̣ܩܵܐ ܠܝܼ ܕܓܲܪܘܸܣܸܢ ܒܓ̃ܲܠܕܘܼܬܵܐ ܘܝܵܬܒܸܢ ܥܲܠ ܚܲܨܵܐ ܕܣܘܼܣܵܐ ܐܲܝܟ̣ ܒܵܒܝܼ..

ܘܐܵܗܵܐ ܝܗܘܵܐ ܗ݁ܘ ܚܸܠܡܵܐ ܒܘܼܫ ܒܲܣܝܼܡܵܐ ܩܵܬܝܼ، ܕܝܵܬܒܸܢ ܠܚܲܨܵܐ ܕܣܘܼܣܵܐ ܟܲܕ ܕܸܪܝܵܐ ܠܐܝܼܣܵܪܬܝܼ (ܬܘܿܦ) ܥܲܠ ܪܸܦ̮ܫܝܼ ܕܚܵܡܸܢ ܒܢܲܝ̈ ܡܵܬܝܼ ܘܩܸܢܝܵܢܲܝ̈ܗܝ..

ܗܵܕܟ̣ܵܐ ܝܘܢ ܨܲܠܡܘܿܢܹܐ ܟܲܕ ܩܲܪܒܘܿܢܹܐ ܨܹܝܕ݂ ܝܸܡܝܼ.. ܐܝܼܢܵܐ ܐܝܼܡܲܢ ܕܚܙܹܐܠܝܼ ܠܒܲܟܼ̈ܬܵܬ݂ܵܐ ܕܡܵܬܲܢ ܟܠܲܝܗܝ ܡܲܩܘܘܿܚܹܐ ܘܒܸܩܪܵܝܵܐ ܒܝܼ ܒܢܘܿܢܲܝ̈ܗܝ ܕܐܵܬܝܼ ܒܓ̃ܲܠܕܘܼܬܵܐ، ܦܘܿܪܦܸܣܠܲܝܗܝ ܟܠܲܝܗܝ ܨܲܠܡܲܢ̈ܝܵܬܝܼ، ܐܸܠܵܐ ܡܸܢ݇ܕܪܹܫ ܠܵܐ ܚܫܸܒ̣ܠܝܼ ܕܡܸܢܕܝܼ ܣܸܪܝܵܐ ܝܲܢ ܨܵܘܵܢܵܐ ܩܘܼܘܸܡܵܐ ܝ݇ܠܹܗ، ܡܛܠ ܒܬܲܚܡܲܢܬܵܐ ܕܟ̣ܝܼܬܵܐ ܕܙܥܘܿܪܘܼܬܵܐ ܘܫܲܒ̣ܪܘܼܬܵܐ ܠܵܐ ܡܵܨܝܵܢܬܵܐ ܝܗܘܵܐ ܕܗܲܡܸܢܸܢ ܗܘܵܐ ܝܲܢ ܚܵܫܒܸܢ ܗܘܵܐ ܕܐܝܼܬ ܓܵܘ ܒܪܝܼܬܵܐ ܡܲܢܝܼ ܕܡܓ̃ܲܪܸܒ ܕܡܲܚܪܸܒ̣ ܗ݁ܘ ܦܲܪܕܲܝܣܵܐ ܥܕܹܢܵܝܵܐ ܕܡܵܬܲܢ.

ܘܗܵܕܟ̣ܵܐ، ܡܸܢܫܹܠܬܵܢܹܐ ܕܡܛܵܝܬܝܼ ܠܝܸܡܝܼ ܩܲܡ ܚܵܦܩܵܐ ܠܝܼ ܓܵܘ ܨܲܕܪܵܗ݁ ܐܲܝܟ̣ ܕܐܸܢ ܠܹܐ ܝܗܘܵܐ ܚܙܝܼܬܝܼ ܚܲܕ݇ ܕܲܪܝܵܐ ܫܸܢܹ̈ܐ، ܘܡܘܿܢܬܸܪܵܗ݁ ܕܸܡܥܹ̈ܐ ܟܲܕ ܒܸܢܫܵܩܝܼ ܓܵܘ ܩܸܨܝܼ ܘܒܹܐܡܵܪܵܐ: ܒܪܘܿܢܝܼ.. ܒܪܘܿܢܝܼ..

ܪܥܸܫܠܝܼ ܕܚܲܕ݇ ܡܸܢܕܝܼ ܩܘܼܘܸܡܵܐ ܝܠܹܗ، ܐܵܦܸܢ ܕܠܹܐ ܝܘܸܢ ܡܨܵܝܵܐ ܚܲܬܝܼܬܵܐܝܼܬ ܕܝܵܕܥܸܢ ܡܘܿܕܝܼ ܗܘܵܐ..

 ܟܲܕ ܚܠܝܼܨܵܐ ܓܵܘ ܚܦܵܩܵܐ ܘܨܲܕܪܵܐ ܕܝܸܡܝܼ، ܚܙܹܐܠܝܼ ܠܟܠܲܝܗܝ ܒܢܝ̈ ܡܵܬܲܢ ܫܓܼܝܼܫܹ̈ܐ ܘܒܸܓ̃ܘܵܓ̃ܵܐ ܠܐܲܟ̣ܵܐ ܘܬܵܡܵܐ.. ܚܙܹܐܠܝܼ ܠܣܵܒ̣ܘܿܢܝܼ ܣܢܝܼܕܵܐ ܠܟܘܼܦܵܠܹܗ ܡܲܠܝܘܿܙܹܐ ܐܲܝܟ̣ ܕܐܸܢ ܛܲܥܘܿܠܹܐ ܝܗܘܵܐ ܓܘܼܕܬܵܐ ܕܡܲܐܟ̣ܘܿܠܹܐ.. ܣܵܒ̣ܬܘܿܢܬܝܼ ܛܥܝܼܢܬܵܐ ܠܡܙܝܼܕܼܵܐ ܝܲܩܘܼܪܵܐ ܠܚܲܨܵܗ݁ ܘܓ̃ܲܪܘܼܒܹܐ ܕܩܵܕܡܵܐ ܠܣܵܒ̣ܘܿܢܝܼ.. ܘܡܵܡ ܚܲܕ݇ܒ̣ܫܵܒܵܐ ܓܵܘ ܗܵܝ ܐܲܝܟܵܢܘܼܬܵܐ ܠܹܐ ܝܗܘܵܐ ܡܘܿܢܫܝܵܐ ܕܫܵܩܸܠ ܗܘܵܐ ܠܩܲܠܘܼܢܹܗ ܥܲܡܹܗ، ܡܛܠ ܕܬܪܹܝ ܡܸܢܕܝܵܢܹ̈ܐ ܐܲܚܟ̃ܝܼ ܥܵܒܸܕ ܗܘܵܐ ܡܵܡ ܚܲܕ݇ܒ̣ܫܵܒܵܐ: ܬܲܢܬܲܢܬܵܐ ܕܩܲܠܘܼܢܵܐ ܘܗܲܩܘܿܝܹܐ ܬܘܼܢ̈ܝܵܬ݂ܵܐ ܕܐܲܒܼܵܗܼܬ݂ܵܐ ܩܵܬܲܢ ܐܲܚܢܲܢ ܙܥܘܿܪܹܐ ܕܡܵܬܵܐ.

 ܟܠܲܝܗܝ ܒܸܪܚܵܛܵܐ ܗܘܵܘ ܐܲܝܟ̣ ܟܡܵܐ ܕܡܵܨܝܼ ܗܘܵܘ.. ܛܥܝܼܢܹ̈ܐ ܠܝܘܼܩܪܵܐ ܐܲܝܟ̣ ܟܡܵܐ ܕܡܵܨܝܼ ܗܘܵܘ.. ܘܗܵܕܟ̣ܵܐ ܓ̃ܘܝܼܓ̃ܠܲܢ..

ܒܕܘܼܟܵܬ݂ ܡܲܝ̈ܵܐ ܨܸܦ̈ܝܹܐ ܕܥܲܝ̈ܢܵܬ݂ܵܐ، ܐܵܢܝܼ ܕܒܝܼܝܵܝܗܝ ܐܵܦ ܣܵܚܲܚ ܗܘܵܘ، ܐ݇ܬܹܐ ܠܗܘܿܢ ܒܫܵܘܦܲܝܗܝ ܡܲܝ̈ܵܐ ܨܡܝܼܪܹܐ ܕܫܵܬܲܚ ܡܸܢܲܝܗܝ..

ܟ̃ܝܼܥܬܵܐ ܕܟܲܪܥܵܐ ܚܠܸܦܠܵܗ݁ ܠܦܲܪܬܘܿܚܹܐ ܕܠܲܚܡܵܐ ܬܦܝܼܢܵܐ..

ܗܲܠ ܕܫܪܹܐܠܲܢ ܓܵܘ ܡܵܬܵܐ ܚܲܕܬܵܐ.. ܗܲܝܓܵܗ ܡܘܿܢܝܸܚܠܝܼ ܡܸܢ ܠܹܐܘܬܵܐ ܕܐܘܼܪܚܵܐ، ܘܒܟܹܐ ܠܝܼ ܕܦܪܸܫܠܝܼ ܡܸܢ ܡܵܬܝܼ..

ܘܓܘܿܪܘܸܣܠܝܼ ܘܒܟܹܐ ܠܝܼ ܕܠܹܐ ܝܘܸܢ ܒܸܚܙܵܝܵܐ ܠܚܲܒ̣ܪܵܢܝܼ ܘܒܲܪܫܲܪܟܝܼ.. ܡܸܢܲܝܗܝ ܡܝܼܬܹ̈ܐ ܗܘܵܘ ܘܡܸܢܲܝܗܝ ܛܠܝܼܩܹ̈ܐ.. ܘܗ݁ܘ ܣܵܗܡܵܐ ܦܝܼܫܵܐ ܕܡܸܢܲܝܗܝ ܓܘܿܪܘܸܣܠܹܗ ܘܩܲܡ ܫܵܒܸܩܠܝܼ ܘܪܚܸܫܠܹܗ، ܡܸܢܲܝܗܝ ܓ̃ܲܠܕܹܐ ܢܫܹܐܠܹܗ ܠܐܸܬ݂ܡܵܠܝ، ܣܪܹܒ̣ܠܹܗ ܠܐܸܕܝܘܿܡ، ܛܠܸܩܠܹܗ ܒܩܘܼܕܡܹܝ.. ܘܦܸܫܠܝܼ ܒܢܲܦ̮ܫܝܼ، ܝܲܢ ܗܵܕܟ̣ܵܐ ܚܫܸܒ̣ܠܝܼ..

 ܐܝܼܢܵܐ ܓܵܘ ܓܲܠܠܹܐ (ܠܲܦܹ̈ܐ) ܕܓ̃ܲܪܘܿܒܹܐ ܗܘܵܘ ܡܚܵܝܬܝܼ ܩܵܐ ܕܫܵܡܛܸܢ، ܬܦܸܩܠܝܼ ܒܣܲܒ̣ܪܵܐ ܟܲܕ ܡܛܘܿܠܩܵܐ ܠܣܲܒ̣ܪܵܐ..

ܬܦܸܩܠܝܼ ܒܝܼܵܟ̣ܝ ܚܲܒܝܼܒ̣ܬܝܼ، ܝܲܢ ܡܵܢܝܼ ܕܐܲܝܟ̣ ܕܝܼܵܟ̣ܝ ܚܲܒܝܼܒ̣ܬܝܼ، ܟܠܲܝܗܝ ܚܸܠܡ̈ܝܼ ܥܲܬܝܼܩܹ̈ܐ ܕܛܸܫ̈ܝܹܐ ܗܘܵܘ ܬܚܹܝܬ ܥܲܦܪܵܐ ܕܡܲܢܫܵܝܬܵܐ ܗܵܐ ܐܲܕܝܘܿܡ ܡܢܘܿܚܸܡܠܗܘܿܢ..

ܟܡܵܐ ܣܲܟ̣ܠܵܐ ܝܘܸܬ ܙܲܒ̣ܢܵܐ.. ܟܡܵܐ ܣܲܡܝܵܐ ܝܘܸܬ ܙܲܒ̣ܢܵܐ.. ܟܲܕ ܒܸܚܫܵܒ̣ܝܼ ܝܘܸܬ ܗܵܠܵܐ ܙܥܘܿܪܵܐ ܝܘܸܢ ܘܠܹܐ ܡܗܲܝܡܢܸܢ ܕܐܝܼܬ ܒܝܼܫܬܵܐ ܓܵܘ ܕܘܼܢܝܹܐ، ܘܗܵܕܟ̣ܵܐ ܡܓ̃ܲܪܘܿܒܹܐ ܝܘܸܬ ܕܬܵܢܸܬ ܠܫܲܪܒܘܼܟ̣، ܕܫܲܚܠܸܦܸܬ ܡܲܝ̈ܵܐ ܨܸܦܝܹ̈ܐ ܠܐ݇ܚܪܹܢܹܐ ܨܡܝܼܪܹܐ، ܕܫܲܚܠܸܦܸܬ ܟ̃ܝܼܥܬܵܐ ܕܟܲܪܥܵܐ ܒܦܲܪ̈ܬܘܼܚܹܐ ܕܠܲܚܡܵܐ ܬܦܝܼܢܵܐ..

ܡܲܢܫܘܿܝܹܐ ܝܘܸܬ ܩܵܐ ܕܓܘܿܪܘܸܣܵܐ ܝܘܸܢ..

ܡܲܢܫܘܿܝܹܐ ܝܘܸܬ ܕܐܵܢܵܐ ܠܵܐ ܝܘܸܢ ܡܘܿܢܫܝܼܵܐ ܠܬܘܼܢܵܝܵܐ ܕܩܲܛܝܼܢܹܐ ܓܲܢ݇ܒܵܪܵܐ ܕܫܡܝܼܥܵܐ ܝܘܸܢ ܡܸܢ ܡܵܡ ܚܲܕ݇ܒ̣ܫܵܒܵܐ..

ܡܲܢܫܘܿܝܹܐ ܝܘܸܬ ܕܐܵܢܵܐ ܠܹܐ ܝܘܸܢ ܡܘܿܢܫܝܼܵܐ ܫܲܪܒܵܐ ܕܐܲܒ̣ܵܗ̈ܝܼ..

ܡܲܢܫܘܿܝܹܐ ܝܘܸܬ ܩܵܐ ܕܩܵܠܵܐ ܕܙܸܡܪܵܐ ܕܒܵܒܝܼ ܓܵܘ ܡܲܘܬ̈ܒܹܐ (ܕܝܼܘܵܢܹ̈ܐ) ܗܵܠܵܐ ܙܲܢܓܘܿܪܹܐ ܝܠܹܗ ܓܵܘ ܢܵܬܝܼ ܟܲܕ ܙܵܡܸܪ ܗܘܵܐ:

ܒܲܪܸܟ̣ܠܝܼ ܝܵܐ ܝܸܡܝܼ، ܪ݇ܚܵܫܵܐ ܝܘܢ ܦܠܵܫܵܐ ܒܲܪܸܟ̣ܠܝܼ

ܠܵܐ ܦܵܫܡܵܬܝ ܐܸܢ ܫܡܝܼܥܠܵܟ̣ܝ ܦܝܼܫܵܐ ܝܘܢ ܓܒ̣ܝܼܠܵܐ ܒܕܸܡܝܼ (1)

 ܝܲܢ ܠܩܵܠܵܐ ܕܝܸܡܝܼ ܟܲܕ ܙܵܡܪܵܐ ܗܘܵܬ:

ܩܘܿܡ ܙܡܘܿܪ ܐܲܝܟ̣ ܒܘܼܠܒܘܼܠ ܓܵܘ ܘܲܪܕܹܐ ܠܵܐ ܙܕܝܼܥ ܡܸܢ ܡܵܘܬܵܐ (1)

ܟܠܲܝܗܝ ܒܸܕܟ̣ܵܪܲܝܗܝ ܝܼܘܸܢ، ܘܡܲܕܟ̣ܘܿܪܲܝܗܝ ܩܵܐ ܚܲܒܝܼܒ̣ܬܝܼ ܝܲܢ ܡܵܢܝܼ ܕܐܲܝܟ̣ ܚܲܒܝܼܒ̣ܬܝܼ..

ܐܵܦ ܡܲܙܝܘܿܕܹܐ ܝܘܸܢ ܥܲܠܲܝܗܝ ܙܡܝܼܪܬܝܼ:

ܕܵܥܪܲܚ ܚܲܕ݇ ܠܸܒܵܐ ܒܹܝܠ ܬܸܪܘܲܝܗܝ ܙܵܒܹ̈ܐ

ܚܵܝܲܚ ܚܲܕ݇ ܠܸܒܵܐ ܒܹܝܠ ܬܸܪܘܲܝܗܝ ܙܵܒܹ̈ܐ

ܡܵܝܬܲܚ ܚܲܕ݇ ܠܸܒܵܐ ܒܹܝܠ ܬܸܪܘܲܝܗܝ ܙܵܒܹ̈ܐ

ܡܢܲܚܡܲܚ ܚܲܕ݇ ܠܸܒܵܐ ܒܹܝܠ ܬܸܪܘܲܝܗܝ ܙܵܒܹ̈ܐ

ܩܫ. ܥܡܢܘܐܝܠ ܝܘܚܢܢ

1981

(1) ܥܘܢܝ̈ܬܐ ܡ̣ܢ ܙܡܝܪܵܬ݂ܵ ܝܪܬܘܬܢܝ̈ܬܐ ܐܬܘܪܵܝܵܬܵܐ