Etota
ܣܘܿܓ̣ܝܬ̣ܵܐ ܠܐܝܼܩܵܪܵܐ ܕܥܹܐܕ̣ܵܐ ܡܵܪܵܢܵܝܵܐ ܕܨܠܝܼܒ̣ܵܐ ܣܓ̣ܝܼܕ̣ܵܐ
ܐ- ܐܹܝܠ ܐܲܠܵܗܵܐ ܒܵܪܘܿܝܵܐ ܕܚܲܝܘܼܬ̣ܵܐ ܐܲܪܥܵܐ ܘܫܡܲܝܵܐ
ܗܲܒ̣ܠܲܢ ܥܘܼܕܪܵܢܘܼܟ̣ ܡܵܪܝܵܐ ܡܫܲܒܚܸܚܠܘܼܟ̣ ܒܩܵܠܵܐ ܚܲܠܝܵܐ
ܒ- ܒܩܵܠܹ̈ܐ ܚܸܠܝܹ̈ܐ ܘܩܝܼ̈ܢܵܬ̣ܵܐ ܙܵܡܪܸܚ ܟܠܲܢ ܬܸܫܒ̈ܚܵܬ̣ܵܐ
ܥܲܡ ܟܪ̈ܘܿܒܹܐ ܘܚܲܝ̈ܠܵܘܵܬ̣ܵܐ ܒܐܵܗܵܐ ܝܵܘܡܵܐ ܕܚܲܕ̣̈ܘܵܬ̣ܵܐ
ܓ- ܓܵܘ ܕܐܵܗܵܐ ܥܹܐܕ̣ܵܐ ܦܨܝܼܚܵܐ ܨܠܝܼܒܹܗ ܕܦܵܪܘܿܩܲܢ ܡܫ݇ܟ̃ܝܼܚܵܐ
ܫܘܼܠܛܵܢܹܗ ܒܐܲܪܥܵܐ ܡܬ̣ܝܼܚܵܐ ܒܐܲܪܒܲܥܦܸܢ̈ܝܵܢ ܢܲܨܝܼܚܵܐ
ܕ- ܕܘܿܨ ܝܵܐ ܥܲܡܵܐ ܟܪܸܣܛܝܵܢܵܐ ܦܨܘܿܚ ܝܵܐ ܓܸܢܣܵܐ ܥܲܦܪܵܢܵܐ
ܨܠܝܼܒ̣ܐ ܥܒܸܕܠܹܗ ܦܘܼܪܩܵܢܵܐ ܚܛܵܗ̈ܘܼܟ̣ ܩܢܹܐܠܲܝܗܝ ܫܘܼܒ̣ܩܵܢܵܐ
ܗ- ܗܲܠܸܠܘܿܝܵܗ ܘܙܘܼܡܵܪܹܐ ܬܸܫܒܘܿܚ̈ܝܵܬ̣ܵܐ ܘܙܘܼܡܵܪܹܐ
ܢܵܩܫܸܚ ܒܩܵܠܵܐ ܕܟܸܢܵܪܹܐ ܥܲܡ ܕܵܘܝܼܕ̣ ܪܲܒ ܙܲܡܵܪܹܐ
ܘ- ܘܥܵܒ̣ܕܸܚ ܠܸܫܵܢܲܢ ܣܵܦܪܵܐ ܡܫܲܒܚܸܚܠܘܼܟ̣ ܡܫܸܡܫܵܐ ܘܣܵܗܪܵܐ
ܥܲܡ ܫܡܲܝܵܐ ܘܟܵܘܟܒܹ̈ܐ ܕܒܲܗܪܵܐ ܡܸܢ ܨܲܦܪܵܐ ܥܕܲܡܵܐ ܠܨܲܦܪܵܐ
ܙ- ܙܩܝܼܦܵܐ ܘܨܠܝܼܒ̣ܵܐ ܕܡܸܢ ܩܲܝܣܵܐ ܦܬܸܚܠܹܗ ܬܲܪܥܵܐ ܠܦܲܪܕܲܝܣܵܐ
ܕܥܵܒ̣ܪܝܼ ܟܠܲܝܗܝ ܒܢܲܝ̈ ܓܸܢܣܵܐ ܕܐܵܕ̣ܵܡ ܚܸܛܝܵܐ ܒܝܲܕ̣ ܩܲܝܣܵܐ
ܚ- ܚܘܼܒܵܐ ܘܫܲܝܢܵܐ ܥܲܡ ܫܠܵܡܵܐ ܫܪܹܐܠܹܗ ܒܹܝܠ ܥܘܼܡܩܵܐ ܘܪܵܘܡܵܐ
ܒܝܲܕ̣ ܨܠܝܼܒ̣ܵܐ ܨܒ̣ܝܼܥܵܐ ܒܲܕ̣ܡܵܐ ܕܝܼܫܘܿܥ ܦܵܪܘܿܩܹܗ ܕܥܵܠܡܵܐ
ܛ- ܛܘܼܦ̮ܣܵܐ ܕܥܲܠ ܡܲܟܝܼܟ̣ܘܼܬ̣ܵܐ ܕܠܲܝܬܠܹܗ ܒܐܲܪܥܵܢܹ̈ܐ ܕܡܘܼܬ̣ܵܐ
ܗܝܼܒ̣ܠܹܗ ܡܫܝܼܚܵܐ ܒܙܩܝܼܦܘܼܬ̣ܵܐ ܩܵܐ ܒܢܘܿܢܹ̈ܐ ܕܡܲܥܡܘܿܕܝܼܬ̣ܵܐ
ܝ- ܝܘܼܩܪܵܐ ܕܚܛܝܼܬܲܢ ܝܲܩܘܼܪܵܐ ܛܥܸܢܹܗ ܠܚܘܿܕܹܗ ܒܲܪ ܢܘܿܗܪܵܐ
ܥܲܠ ܨܠܝܼܒ̣ܵܐ ܘܓܵܘܹܗ ܕܩܲܒ̣ܪܵܐ ܕܦܵܪܩܸܚ ܡܓܹܗܲܢܵܐ ܘܢܘܼܪܵܐ
ܟ- ܟܝܵܢܵܐ ܕܐ݇ܢܵܫܘܼܬ̣ܘܼܟ̣ ܡܫܝܼܚܵܐ ܚܛܝܼܬ̣ܵܐ ܘܒܝܼܫܬܵܐ ܠܵܐ ܦܠܝܼܚܵܐ
ܒܨܸܒ̣ܝܵܢܘܼܟ̣ ܠܨܠܝܼܒ̣ܵܐ ܕܒ̣ܝܼܚܵܐ ܕܣܵܛܵܢܵܐ ܦܵܐܹܫ ܩܦܝܼܚܵܐ
ܠ- ܠܵܐ ܡܨܹܐ ܦܘܼܡܵܐ ܘܠܸܫܵܢܵܐ ܕܡܲܢܗܸܪ ܒܡܹܐܡܪܵܐ ܘܩܸܪܝܵܢܵܐ
ܥܲܠ ܪܲܒܘܼܬ̣ ܐ݇ܪܵܙ ܦܘܼܪܩܵܢܵܐ ܪܵܥܝܵܐ ܕܒ̣ܝܼܚܵܐ ܚܠܵܦ ܥܵܢܵܐ
ܡ- ܡܵܘܬܵܐ ܕܡܲܘܠܸܕ ܚܲܝܘܼܬ̣ܵܐ ܨܠܝܼܒ̣ܵܐ ܕܡܲܩܢܹܐ ܚܹܐܪܘܼܬ̣ܵܐ
ܚܙܹܐܠܵܗ݁ ܥܹܕܬܵܐ ܒܙܩܝܼܦܘܼܬ̣ܵܐ ܘܡܘܿܘܕܹܐܠܵܗ݁ ܒܦܘܼܡ ܫܠܝܼܚܘܼܬ̣ܵܐ
ܢܢ- ܢܸܟܣܘܼܟ̣ ܐ݇ܝܟܵܐ ܝ݇ܠܹܗ ܝܵܐ ܡܵܘܬܵܐ ܐ݇ܝܟܵܐ ܝܠܵܗܿ ܙܵܟ̣ܘܼܬ̣ܵܟ̣ܝ ܩܒ̣ܵܪܬܵܐ
ܩܛܝܼܠ ܡܵܘܬܵܐ ܥܲܠ ܓܵܓ̣ܘܿܠܬܵܐ ܒܝܲܕ ܨܠܝܼܒ̣ܵܐ ܡܠܹܐ ܬܸܕ̣ܡܘܿܪܬܵܐ
ܣ- ܣܲܒ̣ܪܵܐ ܕܚܲܝܹ̈ܐ ܡܬ̣ܘܿܡܵܝܹ̈ܐ ܒܐܲܬ̣ܪܵܐ ܕܛܘܼܒܹ̈ܐ ܥܕܹܢܵܝܹ̈ܐ
ܫܘܿܪܸܪܹܗ ܠܡܝܼܬܹ̈ܐ ܘܚܵܝܹ̈ܐ ܥܡܝܼܕܹ̈ܐ ܒܲܫܡܹܗ ܡܫܝܼܚܵܝܹ̈ܐ
ܥ- ܥܹ̈ܕܵܬ̣ܵܐ ܒܟܠܵܗܿ ܬܹܒܹܝܠ ܟܸܢܫܹ̈ܐ ܕܲܠܬܲܚܬ ܥܲܡ ܕܲܠܥܸܠ
ܫܘܼܒܵܚܹ̈ܐ ܒܐܝܼܡܵܡ ܘܲܒ̣ܠܹܝܠ ܡܲܣܘܿܩܹܐ ܠܥܲܡܵܢܘܿܐܹܝܠ
ܦ- ܦܵܪܘܿܩܵܐ ܕܟܠܲܢ ܡܫܝܼܚܵܐ ܐܲܠܵܗܲܢ ܘܡܲܠܟܲܢ ܡܫܝܼܚܵܐ
ܫܡܘܿܥ ܠܒܵܥܘܼܬܲܢ ܢܲܨܝܼܚܵܐ ܩܕܵܡ ܬܪܘܿܢܘܿܣ ܕܡܲܕ̣ܒܚܘܼܟ̣ ܫܒ̣ܝܼܚܵܐ
ܨ- ܨܠܝܼܒ̣ܘܿܟ̣ ܗܘܹܐܠܹܗ ܢܵܛܘܿܪܵܐ ܨܠܝܼܒ̣ܘܿܟ̣ ܗܵܘܹܐ ܢܵܛܘܿܪܵܐ
ܨܠܝܼܒ̣ܘܿܟ̣ ܩܵܐ ܥܹܕܬܘܼܟ̣ ܫܘܼܪܵܐ ܨܠܝܼܒ̣ܘܿܟ̣ ܩܵܐ ܟܸܢܫܲܢ ܣܲܒ̣ܪܵܐ
ܩ- ܩܘܼܪܒܵܢܵܐ ܕܦܲܓ̣ܪܵܐ ܘܲܕ̣ܡܵܐ ܕܝܼܫܘܿܥ ܦܵܪܘܿܩܹܗ ܕܥܵܠܡܵܐ
ܩܵܪܒܸܚ ܟܠܲܢ ܒܗܵܢ ܝܵܘܡܵܐ ܒܠܸܒܵܐ ܕܲܟ̣ܝܵܐ ܕܠܵܐ ܡܘܿܡܵܐ
ܪ- ܪܲܒܘܼ ܐ݇ܪܵܙܵܐ ܕܦܘܼܪܩܵܢܵܐ ܕܡܩܲܕܫܵܐ ܥܹܕܬܵܐ ܒܩܘܼܪܒܵܢܵܐ
ܦܲܓ̣ܪܵܐ ܘܲܕ̣ܡܵܐ ܡܚܲܣܝܵܢܵܐ ܕܲܡܠܸܟ̣ ܡܲܠܟܹ̈ܐ ܫܡܲܝܵܢܵܐ
ܫ- ܫܒ̣ܝܼܚ ܒܲܛܢܘܼܟ̣ ܝܲܠܕܘܼܟ̣ ܕܸܢܚܘܼܟ̣ ܦܸܨܚܘܼܟ̣ ܚܲܫܘܼܟ̣ ܐܵܦ ܩܝܵܡܬܘܼܟ̣
ܣܘܼܠܵܩܘܼܟ̣ ܘܨܠܵܝܬ̣ܵܐ ܕܪܘܿܚܘܼܟ̣ ܓܸܠܝܵܢܘܼܟ̣ ܘܥܹܐܕܵܐ ܕܨܠܝܼܒ̣ܘܼܟ̣
ܬ- ܬܵܘܕܝܼܬ̣ܵܐ ܠܘܼܟ̣ ܡܟܠ ܦܘܼܡ̈ܝܼܢ ܣܸܓ̣ܕ̣ܵܬ̣ܵܐ ܡܸܢ ܟܠ ܥܲܡܡ̈ܝܼܢ
ܗܵܫܵܐ ܘܲܒ̣ܟ̣ܠ ܥܸܕܵܢ̈ܝܼܢ ܠܥܵܠܲܡ ܘܲܠܥܵܠܡܝܼܢ ܐܵܡܹܝܢ.
ܩܫܝܫܐ ܥܡܢܘܐܝܠ ܝܘܚܢܢ
ܢܘܗܕܪܐ 5 ܐܝܠܘܠ 1995