ܥܠ ܒܪܢܫܐ: ܣܝܵܡܵܐ ܕܟ̣ܵܡܝܼܣ ܒܲܪ ܩܲܪܕܵܚܹ̈ܐ

ܗܪܓܐ ܥܠ ܒܪܢܫܐ
ܣܝܵܡܵܐ ܕܟ̣ܵܡܝܼܣ ܒܲܪ ܩܲܪܕܵܚܹ̈ܐ ܐܲܪܒܝܼܠܵܝܵܐ
(ܕܵܪܵܐ ܬܠܵܬ̣ܥܣܝܼܪܵܝܵܐ)

ܐ: ܐܘܿ ܠܵܟ݂ ܒܲܪܢܵܫܵܐ: ܕܵܘܝܵܐ ܘܚܲܠܵܫܵܐ
ܥܲܕ݂ ܐܝܼܬ݂ ܒܹܗ ܢܲܦ̮ܫܵܐ: ܬܲܘܠܥܵܐ ܒܹܗ ܪܵܚܫܵܐ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܒ: ܒܪܝܼܬ݂ܵܐ ܕܡܸܬ݂ܚܲܙܝܵܐ: ܒܹܗ ܨܝܼܪܵܐ ܒܓܸܠܝܵܐ
ܘܗܵܝ ܕܠܵܐ ܡܸܬ݂ܚܲܙܝܵܐ: ܒܹܗ ܟܲܣܝܵܐ ܒܟܸܣܝܵܐ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܓ: ܓܒ݂ܝܼܠ ܡܼܢ ܐܲܕ݂ܡܬ݂ܵܐ: ܥܒ݂ܝܼܕ݂ ܡܵܪܹܐ  ܒܪܝܼܬ݂ܵܐ
ܘܡܵܐ ܕܲܡܛܵܬ̤ ܚܲܪܬ݂ܵܐ: ܡܝܼܬ݂ ܐܲܝܟ݂ ܚܲܝ̈ܘܵܬ݂ܵܐ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܕ: ܕܪܲܒܵܐ ܪܲܒܘܼܬܹܗ: ܣܵܗܕܵܐ ܚܲܝܘܼܬܹܗ
ܕܫܝܼܛܵܐ ܫܝܼܛܘܼܬܹܗ: ܩܵܥܝܵܐ ܡܝܼܬ݂ܘܼܬܹܗ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܗ: ܗܸܕ݂ܪܹܗ ܐܲܝܟ݂ ܥܡܝܼܪܵܐ: ܘܐܲܝܟ݂ ܘܲܪܕܵܐ ܣܕ݂ܝܼܪܵܐ
ܘܡܵܘܬܹܗ ܐܲܝܟ݂ ܒܥܝܼܪܵܐ: ܘܐܲܝܟ݂ ܛܲܪܦܵܐ ܢܬ݂ܝܼܪܵܐ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܘ: ܘܫܸܡܫܵܐ ܡܲܢܗܲܪ ܠܹܗ: ܘܣܲܗܪܵܐ ܡܫܲܡܸܫ ܠܹܗ
ܘܟܵܘܟܒܹ̈ܐ ܦܵܠܚܝܼܢ ܠܹܗ: ܘܡܵܘܬܵܐ ܒܵܠܲܥ ܠܹܗ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܙ: ܙܵܡܲܪ ܚܲܠܝܵܐܝܼܬ݂: ܘܚܵܕܹܐ ܚܲܕ݂ܝܵܐܝܼܬ݂
ܘܒ݂ܵܟܹܐ ܚܢܝܼܓ݂ܵܐܝܼܬ݂: ܘܡܲܠܸܠ ܩܲܫܝܵܐܝܼܬ݂
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܚ: ܚܸܠܡܵܐ ܗ݇ܝ̣ ܚܲܕ݂ܘܼܬܹܗ: ܐܵܦ ܢܓ݂ܘܿܪ ܝܵܘ̈ܡܵܬܹܗ
ܩܲܫ̈ܝܵܢ ܬܘܼܩ̈ܠܵܬܹܗ: ܘܥܲܣ̈ܩܵܢ  ܡܲܦ̈ܠܵܬܹܗ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܛ: ܛܵܥܝܵܐ ܝܼܕܲܥܬܹܗ: ܒܵܬܲܪ ܪ̈ܓ݂ܝܼܓ݂ܵܬܹܗ
ܘܠܵܐ ܡܸܬ݁ܕܟܲܪ ܚܲܪܬܹܗ: ܕܲܒ݂ܩܲܒ݂ܪܵܐ ܗ݇ܝ̣ ܕܘܼܟܬܹܗ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܝ: ܝܲܡܵܐ ܦܵܠܲܚ ܠܹܗ: ܘܝܲܒ݂ܫܵܐ ܡܫܲܥܒܲܕ݂ ܠܹܗ
ܘܐܲܪܥܵܐ ܡܟܲܣܝܵܐ ܠܹܗ: ܘܲܫܝܘܿܠ ܡܒܲܠܝܵܐ ܠܹܗ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܟ: ܟܠܡܸܕܸܡ ܐܝܼܬ݂ ܠܹܗ: ܘܣܵܟ݂ ܡܸܕܸܡ ܠܲܝܬ݁ ܠܹܗ
ܕܐܵܦ ܢܲܦ̮ܫܵܐ ܕܝܼܠܹܗ: ܠܵܐ ܡܸܫܬܲܒ݂ܩܵܐ ܠܹܗ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܠ: ܠܫܵܥܹ̈ܐ ܘܥܸܕܵܢܹ̈ܐ: ܘܠܲܪ̈ܦܵܦܹܐ ܡܵܢܹܐ
ܘܫܵܥܬ݂ܵܐ ܕܒ݂ܵܗ݁ ܡܫܲܢܸܐ: ܘܐܲܝܕܵܐ ܗ݇ܝ̣ ܠܵܐ ܪܵܢܹܐ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܡ: ܡܵܐ ܪܚܝܼܡ ܒܚܲܝܘܼܬܹܗ: ܘܡܵܐ ܫܒ݂ܝܼܚܵܐ ܕܡܘܼܬܹܗ
ܟܡܵܐ ܣܢܸܐ ܒܡܝܼܬ݂ܘܼܬܹܗ: ܘܣܲܢܝܵܐ ܣܲܢܝܘܼܬܹܗ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܢܢ: ܢܲܦ̮ܫܹܗ ܠܵܐ ܫܵܠܝܵܐ: ܡܼܢ ܚܲܫܵܐ ܘܪܸܢܝܵܐ
ܘܐܝܼܡܵܡܵܐ ܘܠܸܠܝܵܐ: ܥܕܲܡܵܐ ܕܲܡܫܲܢܝܵܐ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܣ: ܣܵܐܹܡ ܣܝܼ̈ܡܵܬ݂ܵܐ: ܠܙܲܒ݂̈ܢܹܐ ܘܝܵܘ̈ܡܵܬ݂ܵܐ
ܘܗ̤ܘ ܗܵܘܹܐ ܡܢܵܬ݂ܵܐ: ܠܬܲܘܠܥܵܐ ܘܲܠܪܸܡܬ݂ܵܐ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܥ: ܥܵܪܹܩ ܡܼܢ ܡܲܘܬܵܐ: ܘܗ̤ܘ ܥܲܡܹܗ ܒܒܲܝܬܵܐ
ܘܲܠܬܲܚܬ݁ ܡܼܢ ܡܪܵܪܬܵܐ: ܘܲܠܓ݂ܵܘ ܡܼܢ ܢܲܚܬܵܐ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܦ: ܦܓ݂ܘܼܕܬܹ݁ܗ ܒܦܘܼܡ ܣܘܼܣܝܵܐ: ܒܠܵܡܹܗ ܒܦܘܼܡ ܐܲܪܝܵܐ
ܘܗ̤ܘ ܡܸܬ݁ܕܒܲܪ ܒܫܸܒ݂ܝܵܐ: ܘܠܲܝܬ݁ ܠܹܗ ܦܘܼܨܵܝܵܐ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܨ: ܨܵܐܹܕ݂ ܠܹܗ ܠܐܲܝܠܵܐ: ܡܟܲܒܸܫ ܠܹܗ ܠܦܝܼܠܵܐ
ܡܫܲܥܒܸܕ݂ ܠܹܗ ܠܓܲܡܠܵܐ: ܘܢܵܦܹܠ ܐܲܝܟ݂ ܫܲܦܠܵܐ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܩ: ܩܵܛܹܠ ܠܹܗ ܠܢܸܡܪܵܐ: ܘܦܵܟܲܪ ܠܹܗ ܠܢܸܫܪܵܐ
ܘܗ̤ܘ ܐܵܙܹܠ ܕܒ݂ܝܼܪܵܐ: ܐܲܝܟ݂ ܬܵܘܪܵܐ ܒܢܝܼܪܵܐ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܪ: ܪܹܝܚܹܗ ܒܲܣܝܼܡܵܐ: ܘܦܲܪܨܘܿܦܹܗ ܪܚܝܼܡܵܐ
ܒܡܲܦܩܹܗ ܕܡ̣ܢ ܥܵܠܡܵܐ: ܠܵܐ ܦܪܝܼܫ ܡܼܢ ܛܲܡܐܵܐ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܫ: ܫܲܦܝܼܪܵܐ ܨܘܼܪܬܹܗ: ܘܲܗܕ݂ܝܼܪܵܐ ܓܒ݂ܝܼܠܬܹܗ
ܘܡܲܪܝܼܪ ܗ݇ܘ̣ ܡܵܘܬܹܗ: ܘܲܫܒ݂ܝܼܚܵܐ ܩܝܵܡܬܹܗ
ܒܲܪܢܵܫܵܐ ܫܝܼܡܵܐ ܗܘܝܼ ܡܵܪܝ ܒܘܼܝܵܐܹܗ܀

ܬ: ܬܵܐ ܡܵܪܝ ܠܐܝܼܵܠܹܗ: ܘܚܲܕܸܬ݂ ܠܲܚܒ݂ܵܠܹܗ
ܘܪܲܡܪܸܡܵܝܗܝ ܠܫܸܦܠܹܗ: ܕܡܲܢ ܗܵܢܵܐ ܡܲܡܠܠܹܗ
ܘܠܵܟ݂ ܡܵܪܝ ܬܸܫܒܘܿܚܬܵܐ܀