ܣܘܓܼܝܬܐ ܠܐܝܩܪܐ ܕܣܝܡܐܝܕܐ ܠܕܪܓܼܐ ܪܒܐ ܕܟܗܢܘܬܐ

ܩܵܬܘܼܟܼ ܒܵܒܵܐ ܕܟܠ ܒܸܪ̈ܝܵܬܼܵܐ ܟܸܢܫܲܢ ܩܪܵܝܵܐ

ܘܒܫܸܡܘܼܟܼ ܪܲܒܵܐ ܒܢܘܿܢܹ̈ܐ ܕܥܹܕܬܵܐ ܣܲܒܼܪܵܐ ܩܢܵܝܵܐ

ܪ̈ܲܚܡܘܼܟܼ ܡܲܫܦܸܚ ܥܲܠ ܣܵܓܼܕܵܢܘܼܟܼ ܝܵܐ ܚܲܢܵܢܵܐ

ܕܥܵܡܪܝܼ ܒܚܘܼܒܵܐ ܥܲܡ ܐܸܚܕܼܵܕܹܐ ܒܟܠ ܥܸܕܵܢܵܐ

ܝܼܫܘܿܥ ܡܫܝܼܚܵܐ ܟܘܼܡܪܵܐ ܪܲܒܵܐ ܘܪܹܫܵܐ ܕܟܵܗܢܹ̈ܐ

ܦܫܘܿܛܠܹܗ ܠܟܵܗܢܘܼܟܼ ܐܝܼܕܼܵܐ ܕܪ̈ܲܚܡܹܐ ܘܟܠ ܥܘܼܕܪ̈ܵܢܹܐ

ܕܪܵܥܹܐ ܠܥܵܢܵܐ ܙܒܼܝܼܢܬܵܐ ܒܕܸܡܵܐ ܥܲܠ ܓܵܓܼܘܿܠܬܵܐ

ܒܗܲܝܡܵܢܘܼܬܼܵܐ ܘܚܘܼܒܵܐ ܓܡܝܼܪܵܐ ܘܥܲܝܢܵܐ ܙܗܝܼܪܬܵܐ

ܪܘܿܚܵܐ ܕܫܪܹܐܠܹܗ ܒܦܲܢܛܹܩܘܿܣܛܹܐ ܥܲܠ ܬܲܠܡ̈ܝܼܕܹܐ

ܗܘܹܐܠܗܘܿܢ ܟܵܗܢܹ̈ܐ ܩܢܹܐܠܗܘܿܢ ܚܲܝܠܵܐ ܩܵܐ ܡܲܫܚܘܿܕܹܐ

ܗܲܒܼܠܹܗ ܠܟܵܗܢܘܼܟܼ ܕܢܵܛܲܪ ܫܪܵܪܵܐ ܕܗܲܝܡܵܢܘܼܬܼܵܐ

ܘܫܵܘܬܵܦܘܼܬܼܘܼܟܼ ܗܵܘܝܵܐ ܥܲܡܲܢ ܒܐܲܡܝܼܢܘܼܬܼܵܐ

ܥܹܕܬܵܐ ܡܟܼܝܼܪܬܹܗ ܕܡܲܠܟܵܐ ܕܡܲܠܟܹ̈ܐ ܝܼܫܘܿܥ ܡܫܝܼܚܵܐ

ܡܸܢ ܦܘܼܡ ܒܢܘܿܢܵܟܼ̈ܝ ܦܪܘܿܥܠܹܗ ܚܸܩܪܵܐ ܘܡܲܣܸܩ ܫܘܼܒܼܚܵܐ

ܕܣܝܼܡܠܹܗ ܒܓܵܘܵܟܼܝ ܟܵܗܢܹ̈ܐ ܒܚܝܼܪܹ̈ܐ ܘܩܘܼܫܬܵܢܵܝܹ̈ܐ

ܕܗܵܘܝܼ ܦܠܵܚܵܐ ܒܚܲܩܠܵܐ ܕܚܲܝܹ̈ܐ ܪ̈ܘܿܚܵܢܵܝܹܐ

ܬܠܵܬܼܵܐ ܟܲܟܪܹ̈ܐ ܛܥܝܼܢܵܐ ܟܵܗܢܵܐ ܒܝܼ ܣܝܵܡܐܝܼܕܼܵܐ

ܘܫܪܵܝܬܵܐ ܕܪܘܿܚܵܐ ܦܵܪܲܩܠܹܝܛܵܐ ܩܢܘܿܡܵܐ ܣܓܼܝܼܕܼܵܐ

ܕܡܫܲܡܫܵܢܘܼܬܼܵܐ ܘܡܲܥܡܘܿܕܝܼܬܼܵܐ ܬܪܲܥ ܚܲܕܼ̈ܘܵܬܼܵܐ

ܘܩܘܼܕܵܫ ܐ݇ܪܵܙܵܐ ܕܦܲܓܼܪܵܐ ܘܕܸܡܵܐ ܠܩܵܘܠܵܐ ܚܲܕܬܼܵܐ

ܟܵܗܢܹ̈ܐ ܕܥܹܕܬܵܐ ܐܵܣܵܘܵܬܼܵܐ ܕܡܲܐܣܝܼ ܢܲܦ̮ܫܵܐ

ܡܸܢ ܢܸܟܼܝܵܢܹ̈ܐ ܕܐܵܟܹܠܩܲܪܐܵܐ ܣܵܢܐܵܐ ܕܐ݇ܢܵܫܵܐ

ܡܕܲܟܼܝܼ ܒܹܝܬ݇ ܐ݇ܕܪܵܐ ܙܵܪܥܝܼ ܙܲܪܥܵܐ ܛܵܒܼܵܐ ܘܚܵܝܵܐ

ܕܫܠܵܡܵܐ ܘܫܲܝܢܵܐ ܚܘܼܒܵܐ ܘܣܲܒܼܪܵܐ ܐܲܠܵܗܵܝܵܐ

ܕܪܲܓܼ ܟܵܗܢܘܼܬܼܵܐ ܡܸܠܚܵܐ ܕܐܲܪܥܵܐ ܘܢܘܿܗܪܵܐ ܕܥܵܠܡܵܐ

ܕܡܸܢܹܗ ܩܵܢܝܼ ܟܵܗܢܵܐ ܘܟܸܢܫܵܐ ܒܲܗܪܵܐ ܘܛܲܥܡܵܐ

ܗܵܕܟܼܵܐ ܟܠܲܢ ܚܵܕܲܚ ܘܦܵܨܚܲܚ ܒܝܵܘܡܵܐ ܗܵܢܵܐ

ܘܐܵܡܪܲܚ ܒܪܝܼܟܼܵܐ ܕܲܪܓܼܘܼܟܼ ܒܪܝܼܟܼܵܐ ܐܲܚܘܿܢ ܟܵܗܢܵܐ

ܢܘܗܕܪܐ

2 ܛܒܚ 1987